政壇：AO做狗仔隊當培訓
喺現今政治氣候底下，政黨必須靠民意同選票生存，縱使立法會七十名議員中，以建制派佔多數，但唔代表政府議案一定通過，換言之，政府喺立會係冇票嘅，所以但凡有重大或敏感嘅政府議案喺立法會表決前，政府就會出動AO（政務官）狗仔隊去立會箍票，有時班AO甚至人盯人，跟實班議員出入，總之要確保一票都不能少。
設計圖片及對白
立法會議員梁耀忠尋日就質詢政府安排咗幾多人、職級及開支做狗仔隊，公務員事務局局長鄧國威就話，對於資歷淺嘅同事，(目及)實議員出入都係經驗培訓一部分喎！唔知每個月收幾萬元人工嘅AO係咪咁諗呢？
全程(目及)實免走失
每當立法會有敏感議案，政府就會派出好多AO狗仔隊企喺會議廳外，(目及)實班議員出入，避免走失。阿忠就話畀班狗仔隊(目及)住好唔舒服，佢哋根本唔係做政策游說，而係監視。
另一名議員郭家麒就講笑，問當局有冇為狗仔隊提供特訓班，例如安排佢哋去做娛樂版，學吓人哋點樣做狗仔隊喎！
鄧國威就回應話，重要或辯論時間長嘅議案，先至會派公務員落立法會，由各司局長決定人手數目，通常副局長、常任秘書長、副秘長呢啲高級官員先係負責最後游說。至於資歷淺嘅同事，幫手睇人同向司局長匯報議會最新情況，其實都係經驗培訓嘅一部分，佢做咗二十幾年，一直都有呢啲工作，所以唔涉及額外資源喎！
