《爽報》爽死了 淫媒終自斃

最好笑嘅係，壹淫媒仲要死撐，聲稱停止出版香港《爽報》可以使集團理順資源，專注於有利可圖嘅業務喎。你話壹淫媒係咪自慰自爽吖？經營不善搞到嚴重虧蝕，仲有乜嘢「有利可圖」嘅業務吖？讀者眼睛係雪亮嘅，《爽報》日日燒銀紙，派又冇人要，唔摺埋，唔通真係益公公婆婆當廢紙賣咩！

正所謂，多行不義必自斃，多行淫賤必摺埋。《爽報》收檔其實係意料中事，一來《爽報》根本唔係做新聞，而係賣弄色情，誨淫誨盜，教壞細路，搞到屋邨又杯葛，學校又抵制，婦女團體又聲討，依家自我了斷咪當謝罪天下囉。二來咯喎，《爽報》唔止係色情狂，仲有一鋪侵權癮，不斷侵犯東方報業集團知識產權，以抄襲當新聞，以剽竊當專業，一份無品無格又無料嘅免費報，再苟延殘喘落去都係獻世嘅啫。

呢，咁多年來，壹淫媒因違反《淫褻及不雅物品管制條例》而被判罰嘅案例多達一百二十八次，仲厚過電話簿。仲有吖，十八年來壹淫媒盜用東方知識產權累計多達四十九次，向東方賠償或向法庭繳款合計一百三十萬元，其中《爽報》亦有份o架。

所以咯喎，《爽報》執笠，罪有應得，一啲都唔出奇。係呢，《爽報》玩完，幾時輪到成個壹淫媒收檔呢？嗱嗱嗱，唔係危言聳聽o架，壹淫媒近年頭頭碰着黑，掂嗰瓣衰嗰瓣，搞台灣壹電視蝕錢，搞互聯網業務碰壁，搞台灣《爽報》出血，搞香港《爽報》執笠，咁樣燒銀紙法，就算淫賤黎識印銀紙都唔掂啦，何況佢除咗誨淫誨盜，根本唔識印銀紙。嗱，壹淫媒早前公布，截至今年三月底止，全年錄得九點六九億元虧損，較對上一個財政年度增幅超過四倍，大家話壹淫媒仲可以撐得幾耐吖！

話時話，《爽報》瓜柴，《蘋果日報》都唔好得幾多嘅咋，爛果報近年銷量不斷下滑，跌到阿媽都唔認得。係人都知，爛果報一樣宣淫販賤，敗壞風氣，既然《爽報》惡有惡報，蘋果今日未報，時辰未到咋，不過離呢一日應該唔遠咯。

一句講晒，善有善報，惡有惡報，《爽報》猝死係應有此報，壹淫媒繼續宣淫販賤，他朝君體亦相同吖，叮！