前商務及經濟發展局局長馬時亨大女馬露明前年出閣，日前輪到細女馬露玲披上嫁衣，下嫁新加坡籍律師符傑廉。一對新人上周六於教堂行禮，兩日後再喺中環四季酒店擺三十三圍喜酒，之後赴歐洲度蜜月。婚宴場地以新娘子喜愛嘅粉紅色為主，浪漫滿瀉。涉足政商界多年嘅馬時亨人緣佳，婚宴上，政商名人紛紛到賀，整晚賓客如雲、星光熠熠，齊見證一對佳偶步向人生另一階段。

拉埋天窗
馬露玲（右二）下嫁符傑廉（右一）正式成為符太，兩人攜手展開人生新一頁。

恩愛同行
前財政司司長梁錦松（左）邊行邊輕扶太太伏明霞，非常體貼。

最襯夫妻
有「殼王」之稱嘅商人陳國強（右）與太太伍婉蘭嘅衣着襯到絕。

整妝赴會
退休後深居簡出嘅前運輸及房屋局局長鄭汝樺，當晚特意恤個靚髮赴宴。

等娶新抱
「玩具大王」蔡志明（左）同太太蔡李惠莉就快娶新抱，呢晚先嚟賀兩位新人。

摯誠祝福
新鴻基地產聯席主席及董事總經理郭炳江親身到場，並送上摯誠祝福。

握手道賀
特首梁振英（左）向再度榮升外父嘅馬時亨握手道賀，於婚宴中坐足兩個多小時至離開。

抽空出席
英皇集團主席楊受成喺百忙之中都抽空出席婚宴。

第一手消息請下載on.cc東方互動iPhone/iPad/Android/Windows Phone Apps