「新香港人」到底係乜嘢人？點先可以做「新香港人」嘅呢？根據該篇文章所講，「新香港人」其實即係新一代嘅新移民，佢哋普遍比較年輕同有修養，對香港經濟發展有貢獻，喺香港居住，又有嘢做，最重要係咩都唔好反抗，愛國愛黨，咁就為之「新香港人」。該文章仲舉出咗鋼琴家郎朗同影星湯唯做例子。「新香港人」成為咗潮語，但到底係褒係貶，就請自行判斷。

主權移交不經不覺已經十六年，中共當年講過話五十年不變。到咗今日，所謂不變，其實又變咗幾多？馬無錯都仲係照跑，但係馬會馬場裏，又多咗幾多嚟自鄰近地區嘅面孔？跳舞就更加唔使講，昔日盛極一時嘅南方舞團，如今都已成不堪回首的故國月明，「大富豪」、「杜老誌」、「新花都」呢啲地標，都變成港人嘅集體回憶，大江東去。所謂五十年不變，又怎能真的不變？當年你我胸懷大志，希望在大香港大時代創一番事業。今日回頭已是百年身，髮線隨樓價只升不跌，肚腩同生活負擔重到連行步路都無力。我哋嘅城市唔使二十年，就由一個傲視亞洲嘅國際都會，淪為一間為全國兒童服務嘅大藥房，為人民幣服務嘅友誼商店。中國大量對香港殖民，並無上限，難怪《人民日報》都要出番篇文章，正式推出一個新人類品種，就係「新香港人」！

不過我想知嘅係，一直潛伏喺每個家庭，港孩見佢哋多過自己親生父母嘅菲印外僱工人，佢哋對香港嘅貢獻，肯定比湯唯同郎朗多。咁點解佢哋又唔係「新香港人」呢？算啦……其實香港今時今日都唔係由你同我話事，「新香港人」嘅出現，某程度上都有個好處，就係令我哋呢啲土生土長嘅舊香港人死咗條心，等你唔使再抗爭，香港未來只會屬於「新香港人」，原住民無份！

第一手消息請下載on.cc東方互動iPhone/iPad/Android/Windows Phone Apps