繼商務及經濟發展局前局長馬時亨細女露玲日前出嫁後，政商界原來再隔一陣又喜事多多，其中下月二日更至少有三對政商界後代新人出爐，分別係中港照相器材集團主席孫大倫細仔同潮州商會會董林鎮洪女兒、消費者委員會主席黃玉山嘅仔結婚等。聽聞因為撞期，搞到有啲政商界人士好頭痕。

設計圖片及對白

我哋翻查農曆宜忌發現，下月二日的確宜嫁娶，至於點解三對新人揀埋同一日結婚，莫非係父母嘅傳統觀念要揀好日？孫大倫接受查詢時話，佢細仔今年三、四月期間決定同女朋友結婚，隨即向灣仔會展詢問有無場地擺設飲宴，發現基本上檔期都好滿，會展當時回覆有兩個日子，分別就係下月二日同十二月二十九日，所以講笑話呢個大日子係會展幫佢個細仔揀喎！

當問及三對新人撞晒期會否令政商界朋友分身乏術，孫大倫話細仔會擺七十多圍，即有八百多名賓客出席，又感謝各位賓客朋友畀面出席，包括馬時亨、恒生銀行前大班柯清輝等都會出席。

對於佢哋嘅政商界朋友嚟講，就要諗下點樣安排好當日飲宴嘅「路線圖、時間表」去趕場，令佢哋既可以大方得體送上祝賀，又可避免得失任何一方嘞！

第一手消息請下載on.cc東方互動iPhone/iPad/Android/Windows Phone Apps