政壇：玩勻海陸空倫敦市長唔論政
英國倫敦市長約翰遜（Boris Johnson）尋日旋風式訪港，除力銷兩地商貿合作外，期間仲玩盡海陸空，唔單止搭車又搭船，仲連直升機都出動埋，非常搶鏡。不過，當佢被問到香港普選等政治議題時就顯得非常慎言，多番強調呢啲嘢係香港嘅事（A Matter Of Hong Kong），不方便作出評論，認真安守本分。
約翰遜訪港玩盡海陸空，搭完直升機後，搭車又搭船。
約翰遜乘搭倫敦巴士抵達灣仔碼頭，表現得好風騷。
約翰遜早前已率先乘搭直升機喺赤鱲角上空翱翔，高空俯瞰成個香港機場嘅跑道建設，為爭取喺英國興建新機場一事「偷師」。至於尋日早上，佢就乘坐由英國遠道運來嘅新型倫敦巴士抵達灣仔碼頭，顯得好風騷，之後再轉乘天星小輪暢遊維港。
雖然佢全程被傳媒「大包圍」追訪，無時間欣賞維港兩岸景色，但佢依然笑笑口有問必答，即使唔回答政治議題但就多次大讚港人充滿「事必做到精神」（Can do spirit），尤其係喺機場建設方面，想效法之餘，仲話希望可以增加來往兩地嘅直航機數量添！約翰遜下午再到特首辦與特首梁振英會面，就兩地經貿事宜交換意見，梁鼓勵當地企業到香港發展，並開拓內地市場。
