特首粉嶺別墅一直係特首宴請各界人士之用，政府早前決定將粉嶺別墅納入研究範圍探討發展可行性，依家講係咪真係收回言之尚早，相反政府最近就粉嶺別墅有新動作，最近喺報章刊登廣告，宣布聘請家務主管同初級家務助理各一，莫非特首CY梁振英有意增加人手打理一草一木？非也，據聞政府再招聘只因目前嘅家務主管同初級家務助理將會於今年底同期退休，所以基本上係「一換一」，不存在增加人手。

設計圖片

合約工為期兩年

政府最近喺報章刊登招聘廣告，招聘家務主管同初級家務助理各一名，基本上兩個職位嘅入職條件大同小異，都係要喺大戶家庭或大型機構擔任家務工作經驗，具餐飲服務、烹飪等經驗者優先考慮等，其中最大差別係出任家務主管須具有最少六年家務工作經驗。職責方面，家務主管同初級家務助理略有不同，其中前者講到明要提供私人起居及家居服務。

既然上述工作職責可大可小，特首辦呢份招聘廣告薪津又幾有競爭力呢？家務主管同初級家務助理喺建議月薪分別為約二萬元和近一萬三千元，合約為期兩年，據聞政府釐定呢個薪酬水平曾考慮一籃子因素，包括最新勞動市場情況，認為呢個水平係合適。

有政界人士話上述兩份工係筍工，估計應該有好多人應徵呢兩個位，因不似「貪曾」前特首曾蔭權爵士任內貪盡海陸空，歎盡省港澳，加上嘴刁又難服侍，相反CY本身不熱衷烈酒，加上用粉嶺別墅嘅時間多數係周六日，斷估佢哋嘅工作量有限，有人仲講笑話最多嘅工作可能係幫CY打理吓啲花草，真係信不信由你喇！

第一手消息請下載on.cc東方互動iPhone/iPad/Android/Windows Phone Apps