政壇：搞搞政：拆醫管局山頭梁智仁夠薑
隨住「肥胡」胡定旭喺醫院管理局嘅任期即將屆滿，外界對新主席嘅人選一直有唔少揣測，而政府喺上周宣布咗，由憑外表點睇都唔似七十一歲嘅香港公開大學校長梁智仁接任。唔少人都以為，一定係政府搵唔到可委以重任嘅人，所以至委任梁智仁。原來梁智仁係醫療界高人，貪佢本身係醫生，近年又同醫學界保持距離，佢嘅兄長梁智鴻亦做過兩年幾醫管局主席。
設計圖片及對白
梁智仁本身係國際著名骨科專家，喺港大醫學院任職三十八年，除擔任多年系主任外，更加係兩屆醫學院院長。○三年佢退休後加入公開大學，十年間令公開大學由冇乜人識變得有聲有色，依家仲可經大學聯招收生，可見佢並唔簡單。不過，最緊要都係佢向來作風低調唔惹火，喺醫學界又德高望重，加上佢年事已高，大家都唔會亂猜測有咩利益衝突。亦都因為咁，政府早排成立嘅負責調查廉政公署公務酬酢、外訪及餽贈嘅獨立檢討委員會，佢都係委員。
其實，醫管局多年嚟積累咗唔少問題，包括聯網制度下嘅「山頭主義」，搞到七個聯網有七套管理架構，加上該局肥上瘦下，導致前線資源缺乏，醫護人手長期不足，病人睇症等到頸都長，連肥胡都承認喺任內未能解決人手緊張問題，係最令佢遺憾嘅事。
俗語有話「薑愈老愈辣」，究竟梁智仁係咪可以好似「愚公移山」咁，拆咗啲山頭，幫醫管局大改革，大家就要拭目以待喇！
