政府話要增建公屋同居屋講咗好耐，當局終於肯公布實際單位數目、位置同落成年份。雖然五年起八萬個公屋同居屋單位話多唔多，但依家白紙黑字、清清楚楚列晒出嚟，都好過齋噏冇進展嘅。不過，講番轉頭，有計劃都要確切落實先得，張炳千祈唔好紙上談兵，得個講字，否則呢張建屋清單，他日就會成為你失職嘅有力證據。
