政壇：吳文遠返新工搞收購
喺兩年前因要參選立法會選舉而辭去高薪厚職嘅社民連副主席吳文遠，經過一輪尋尋覓覓後終於搵到新工，做番佢最擅長嘅企業收購合併（M&A），唔使好似以前咁靠食穀種度日。至於薪酬有幾豐厚，佢就用一句「不予置評」嚟擋駕。
吳文遠份工要跟歐洲時間做嘢。
吳文遠話早前得到一間國際公司垂青，負責處理該公司喺歐洲地區嘅企業收購工作，現時每個月都要有一個星期飛去歐洲各國同唔同企業洽商。佢話上周先飛去英國成個禮拜，下月又要去德國同荷蘭兩個地方，喺香港時又要按照歐洲時差，喺三更半夜處理公務，真係少啲精力都唔得。
惹火人物嘅佢周不時有官非纏身，問點解該公司仲肯請佢時，佢講笑話可能自己有豐富談判經驗，可能對方就係睇中佢呢點喎。
不過雖然佢成日都要飛來飛去，但佢就趁機去英國各大學搞講座宣傳佔領中環，又話當地學生對呢項議題非常感興趣，未來會再搞多幾場喎！
