政壇：議員鬥亂噏寸爆馮煒光

馮煒光嘅「三個字」句式尋日喺立法會畀議員郭榮鏗寸，郭榮鏗喺特首答問大會上，指免費電視發牌：「三個字：黑箱作業」，話聲一落，在座班議員立即明白，佢喺度寸緊馮煒光喇，於是引起哄堂大笑。

政界人士幫馮煒光句式發揚光大，睇怕馮煒光都始料不及。不過，有好事之徒就對佢嘅委任引頸以待。點解？因為諗住一定有笑料嘛。對於呢種心態，唔知政府點諗呢？三個字：「不予委任」，會唔會多一事不如少一事呢？

曾鈺成口快快講錯嘢

除咗刻意寸人之外，尋日嘅答問大會又有議員講錯嘢。先有地產及建造界議員石禮謙話聽完梁振英講企硬，唔肯就打擊炒樓辣招「減辣」後，覺得前日自己對特首不信任動議議案上投「支持」票係正確嘅選擇，之後至糾正話自己投咗反對票。

連主席曾鈺成都亂噏埋一份，話說有建制派議員要求主席趕發言侮辱梁振英嘅人民力量議員陳偉業離場，曾鈺成一貫地語重心長，呼籲議員們唔好因為不斷爭辯而嘥晒啲時間，搞到特首唔夠時間闡述佢對社會議題嘅睇法，但佢就因為口快快而將「睇緊直播嘅市民」講成「睇緊直播嘅議員」。可能佢覺得議員水平低又無權，議員同市民都係差唔多嘅啫。