舞廳K房大浴場 民航官僚真識歎
睇下電視跳下舞，洗完白白再唱K，開開心心又一Day。咁好享受，太一叮講緊嘅唔係喺乜乜娛樂城蒲，而係喺政府部門返工。邊個部門咁爽？咪又係民航處囉。
民航處新總部大樓設備奢華係人都知，原來除咗專業級舞蹈室、目不暇給嘅「電視城」、超豪裝修「大浴場」，仲有勁爆「K」房，康體娛樂設施一應俱全，你話係咪似娛樂城多過似政府建築吖？
呢，員工餐廳內有兩間「活動室」，普通員工一般唔會入去用膳。齋睇個名冇乜特別，內裏卻大有文章，五十吋大電視、無線咪接收系統、藍光高清播放機同音量調校器樣樣齊全，喇叭都有七個咁多。仲有「機關」㗎，原來兩間房可以打通，合二為一，環境更加寬敞。
有民航處職員踢爆，活動室多數係高層用膳，而設備就係「唱K」用嘅。嘩，咁大間K房，行勻全港九新界睇怕搵唔到幾間。喺度唱番首《I Believe I Can Fly》，一定High到飛起。
民航處擘大眼講大話，死撐大樓內冇卡拉OK設備，活動室平時向所有職員開放，無分職級，影音設施係開會或者舉辦活動時使用嘅。有立法會議員質疑民航處講大話，要求處方「清清楚楚、合情合理」解釋點解會有咁多超豪設備。
估唔到仲未解釋又多一單，本報記者喺新總部大樓對面發現一個雨遮桶，入面有十幾把印有民航處標誌嘅雨遮，方便員工一落車就有遮用。咁嘅待遇喺政府部門睇怕絕無僅有，唔止夠體貼，更加夠誇張。正如有議員批評，咁搞法，畀人感覺到民航處職員有「特權」。
唔係議員吹毛求疵，實情係民航處大花筒洗腳唔抹腳早有前科，仲係衰完一單又一單嗰隻。呢，淨係最近幾個月，已經先後被本報踢爆多宗倒納稅人米嘅醜聞。
從裝修美輪美奐，佔地七百呎，名貴木地板加高級音響器材，三面牆身全部裝嵌鏡面並設芭蕾舞扶手嘅舞蹈室；到高官經常揩油，佔用金鐘道政府合署民航處免費車位泊私家車；到總部大堂、各層走廊無處不在嘅「電視城」；再到擁有廿多間淋浴室嘅豪華「大浴場」，今次仲將活動室變埋K房添，民航處官員貪圖享受亂嘥公帑，正一沒有最奢華，只有更奢華，叮！
