SUN搞作：少膽虫手記：右膠左，再射門
有團體下戰書，挑戰要求「源頭減人」嘅議員，網上掀起一陣罵戰。少膽虫作為右派大報《爛果》腦腫，更加要嚴己以律人，要比右膠還要膠。「高舉海耶克佛利民淫賤黎旗幟！放任窮人自生自滅自由市場萬歲！」少膽虫舉住《我是淫賤黎》的寶書，不停揮動：「我絕對唔歧視新移民！佢哋唔會搞衰香港！」
「高明呀！高明！」編輯肥豪難得喺會上和議少膽虫：「腦腫巧妙地利用一個唔字，就可以既避過評雞會追殺之餘，又可以表達《爛果》立場，高呀！」少膽虫雖然唔係好記得啱啱有無講個「唔」字，心諗橫掂就算屈林奮強頭條新聞都無所謂，是但啦。「總之，大愛包容左膠橫行，總係要將視線轉移去政府呀、人口政策呀咁樣，完全唔覺得啲大陸人有問題！《爛果》一定要繼續做低佢哋，支持減廢三子！」少膽虫企上枱，撐住腰大嗌。
「幾時我哋變咗《太公》、《萌匯》先！」點知記者菜嫌貴又阿吱阿咗摩洛哥：「家陣你係唔係覺得政府做得好好先？」少膽虫立刻指住菜嫌貴：「左膠！少膽虫當年仲左過你！落地獄大審判啦！」菜嫌貴不遑多讓，暗施內力，拍枱拍到少膽虫企唔穩：「壹全霉要源頭減人，先要減你呢?剝削員工嘅大懶虫！」講到呢度，食得太多芙蓉鹹蛋飯嘅員工吱吱喳喳，民怨開始沸騰，大有討伐之意。
「唉呀！你估少膽虫想嘅咩？」少膽虫梗係醒水，見風向不對，偷偷指住已經昏睡嘅淫賤黎：「出氣唔好搵第二個，搵你腦細啦！」
