姚君達將女伴輕抱入懷，女方即變身小鳥依人。
自離婚後，米蘭站主席Bryon姚君達喺感情上一直未有着落，前日喺沙田馬場發現佢同一名貌似「跳水公主」郭晶晶嘅長髮靚女一齊，兩人旁若無人，不知幾溫馨。事後致電Bryon查證，佢直認同靚女正在發展中，Bryon護花心切，叫我哋唔好寫得咁盡，話唔想嚇親女友喎！
二人刻意選擇喺人流稀少嘅看台頂樓談情。
前日下晝約三點半，Bryon如常現身馬場，但今次罕有地與女伴同行。佢哋雙雙前往馬匹亮相圈旁邊嘅會員看台，企喺人流相對稀疏嘅頂樓，似乎係想靜靜享受二人世界。該名靚女身穿黑色喱士短裙露出美腿，戴上墨鏡甚有星味，同有型有款嘅Bryon好登對。
起初Bryon同靚女靠近欄杆有講有笑，又指手畫腳咁向對方介紹馬場環境，大講笑話氹靚女開心，女方似乎相當受落，甜笑並翹實男方。二人漸漸放下戒心愈企愈埋，期間Bryon主動輕抱女伴，並在對方耳邊喁喁細語，女方即變身小鳥依人，雙方談情近一小時後始返回馬會廂房。
Bryon透露，佢哋係經朋友介紹認識，女方叫Jessica，從事酒店業，識咗大半年至開始發展，今次係首次帶對方入馬場。問佢前妻知唔知呢件事？佢回答：「唔知，我哋互不干涉對方生活，但間中有食飯見面。」佢坦言，呢段感情初萌芽，唔想畀女方太大壓力，若然感情穩定咗，一定會同大家公布喎！Bryon曾自爆與前妻離婚後繼續同住，當時佢仲話二人隨時會再結婚，但原來佢哋已分居一年，應該唔會復合喇！
第一手消息請下載on.cc東方互動
