鬍鬚曾嘅網誌空白一片，一度令人誤會佢偷懶冇寫網誌。（資料圖片）
依家班問責高官寧願每個星期都匿埋喺冷氣房寫網誌，都唔肯行來出嚟面對公眾。政府團隊鍵盤戰士之一、財爺鬍鬚曾每逢周日都會喺網站發表每周網誌，即使當日撞正農曆正月初一，定係早排放咗兩個星期大假，佢依然風雨不改繼續寫blog。
不過，尋日當大家例牌上佢嘅網站瀏覽有乜大作時，竟然發現今個星期嘅網誌欄空白一片，莫非鬍鬚曾趁住出訪美國華盛頓，所以乘機偷懶唔做功課？
原來鬍鬚曾今個星期並唔係無寫blog，只不過係因為官方網站出現系統故障，到夜晚先恢復正常。
其實佢今次就趁為期一周嘅美國之行，喺網誌中大談美國財政和債務危機，講佢以中國代表團成員身份，出席喺華盛頓舉行嘅國際貨幣基金組織及世界銀行集團年會，仲同聯儲局主席伯南克會面，討論美國債務上限、貨幣政策及全球經濟展望等議題。
鬍鬚曾話，如果美國真係出現債務違約，將會引起金融市場極大震盪，又話政府會密切注視國際市場變化，做好最壞準備。
第一手消息請下載on.cc東方互動
