政壇：張安琪為祖業寧賺少啲
日前喺一個活動見到順利建材第二代接班人嘅Angela張安琪同老公、仁愛堂總理徐永康及一歲大嘅囝囝Jolyon，Angela話近年舖租有加無減，好彩佢哋一半地舖都係自己物業，減輕成本壓力。佢坦言，若然將物業放租，賺到嘅利潤分分鐘多過賣建材，不過佢話，始終公司都係家族經營嘅心血，加上公司一旦結業，員工就會無以為繼，所以佢寧願賺少啲，都要將盤生意承傳落去。
張安琪（中）同老公徐永康及囝囝Jolyon齊齊現身活動。
Angela仲銳意為公司形象大革新，趁住公司成立三十五周年，先換過型格新標誌，繼而將九間店舖重新裝修，並引入意大利中高檔浴室潔具，件件水龍頭、浴缸都成件藝術品咁，吸引新潮一派青睞。
佢下周將飛往意大利出席浴室潔具展覽，採購貨品兼旅行。佢話浴室潔具近年變化好大，以前買家講求實用多於美觀，隨便搵個水喉師傅來揀就算，但近年唔少業主親自前來選購，試過有買家要求喺水龍頭刻上自己個英文名，口味認真獨特。
