政壇：葉劉囡囡收鹹蛋賀生辰
眾所周知，新民黨主席葉劉淑儀同愛女Cynthia感情要好，Cynthia尋日二十四歲生日，葉劉呢個廿四孝媽咪早幾日幫囡囡喺立法會搞咗個驚喜生日派對，新民黨執委譚榮邦更向Cynthia送上一隻鹹蛋畀佢作為生日禮物添！
鹹蛋？咁奇特。葉劉話，根據老人家所講，壽星仔、壽星女喺生日收到蛋時，一定要食咗個蛋黃，因為粵語中「黃」、「王」、「皇」三字同音，所以用蛋黃嘅「黃」字作諧音，就有「有王管」嘅意思，希望仔女們大個後即使「有毛有翼」，都要聽教聽話，遵從長輩教誨。
就因為咁，所以葉劉尋日喺社交網站祝願Cynthia每日都過得開心之餘，亦都要Cynthia記住，雖然佢已經長大成人，但依然係「有王管」，要聽晒媽咪話喎！
