政壇：馮煒光坎坷情史曝光
經常喺報章撰文，以中產代表自居嘅南區區議員馮煒光，但恨做官恨到發燒嘅佢，自從上周有消息傳出指佢加入政府「熱廚房」做新聞統籌專員（IC）後，佢以往寫過嘅每篇文都即刻聲價十倍，其中一篇大談自己追極都追唔到女朋友嘅潮文，就喺網上瘋傳。原來單身多年嘅馮煒光，一向積極追女仔，但唔係食檸檬就係做觀音兵，仲試過「愛人結婚了，新郎不是他」，只能同女仔過住啲曖昧不明嘅日子。
設計圖片及對白
網民嘲係觀音兵
政界傳聞馮煒光喜歡同電視台女主播混熟，但從未開花結果，原來佢篇潮文就曾經透露，多年來唔係被女仔拒絕，就係同女仔斷斷續續單對單食飯，正當以為有機會，對方先表態話有男友，搞到馮煒光無言以對。文中佢又慨嘆，自己見多識廣唔係宅男，講電影可如數家珍，講菲律賓人質事件都搭到嘴，但唔知點解，總係同異性發展唔到親密關係。
既然香港無市場，馮煒光都試過北望神州同內地女孩交往，但因為白鴿黨嘅身份，女方無法安心，戀情無疾而終。講完一大輪，馮煒光終於有解釋，話上帝好公平，既然上帝賜予自己財政無憂，所以搵唔到另一伴分擔問題。有網民話做觀音兵唔緊要，但做緊兵又以為自己係將軍先最慘，唔知馮煒光算唔算係呢種呢？唔知今次盛傳佢做IC嘅遭遇，同佢過往追女仔有無相似嘅地方呢？
