雙非炸彈陸續爆 點止幼園爭崩頭

雙非家長為咗令子女可以來港讀幼稚園，招數真係五花八門o架。循規蹈矩嘅可以喺北區置業，或者租住劏房；旁門左道嘅可以租用假地址，用錢購買冇床位但有學位嘅一條龍服務。最好笑嘅係，雙非兒童殺到，唔止帶旺北區樓市，仲催生港式「寄宿」行業，為奔波中港兩地嘅雙非兒童提供包食宿保母服務。你話嘞，原區優先變原區賺錢，港產官僚以為臨急補鑊可以解決問題，係咪開心得太早吖？

所以話，雙非問題好似官場現貪腐咁，一旦氾濫成災，撥亂反正談何容易吖。除非咁啦，港府學菲律賓政府咁無賴，一句「文化差異」，就將雙非兒童拒諸門外。不過咪話太一叮唔提醒，雙非兒童持有香港永久居民身份證，如果港府將佢哋拒於門外，隨時被人告歧視！

話時話，雙非問題尾大不掉，後遺症又點止幼稚園爭崩頭吖。即將離任嘅醫管局主席胡定旭話喎，需為雙非兒童日後嘅醫療需求做好準備，而政府更加應該及早作好長遠規劃，應付未來人口發展需要。嗱，公立醫院一度淪為內地孕婦湧港產子重災區，亂象叢生，難得胡定旭唔怕自揭瘡疤，可見雙非遺禍的確唔講得笑o架。你知啦，公共醫療體系本來已經七國咁亂，萬一又被雙非兒童攻陷，隨時玩完。

講到底，港產官僚缺乏長遠規劃，先至係雙非問題嘅根源。係人都知，雙非兒童超過二十萬名，日後陸續回流，必然對社會造成沉重壓力，可惜咁多年嚟，港府翹埋雙手唔去拆彈，又冇整體人口政策，又冇全盤應對措施，又冇周詳行動部署，一味頭痛醫頭，腳痛醫腳，唔搞出大頭佛至奇啦。講句唔好聽，靠呢班後知後覺嘅港產官僚處理雙非問題，唔止攞幼稚園申請表要爭崩頭，遲啲可能睇醫生都要爭崩頭添吖！

學會排隊嘅一小步，就係通往文明世界嘅一大步。今次幼稚園排隊亂象搞到民怨載道，如果港產官僚仲未能吸取教訓，唔該攞多一份表格畀自己，返幼稚園接受再教育啦，叮！