城中鏡：施穎茵歎美食有代價
唔好以為銀行家嘅生活好刻板，滙豐最近搞咗兩次請食飯活動，滙豐香港區零售銀行及財富管理業務主管Diana施穎茵做代表同班信用卡客戶擦餐勁，歎完日本菜，轉頭就食粵菜，飲飽食醉嘅代價唔係跑數，係要跑甩啲卡路里！
Diana同信用卡客戶齊歎粵菜。
聽聞滙豐早排搞咗場四人一圍嘅百圍夜宴，齊歎粵式名菜，連花尾躉斑都有得食，仲有雪耳馬蹄爽潤一潤喉！能夠參與呢場夜宴嘅係一班幸運兒，話說滙豐有個網上投票活動，畀滙豐信用卡持有人揀心水中菜菜譜，然後就會喺最多人揀嘅菜譜中抽出一百個幸運兒，咁先可以同中葡混血兒嘅Diana擦餐勁！
係咪開始覺得banker嘅生活都幾多姿多采？好似Diana咁，可以飲飽食醉。其實banker背後嘅辛酸不足為外人道。嗱！唔知Diana要唔要跑數，但可以肯定嘅係去多幾場夜宴，佢肯定要跑甩呢啲卡路里。
