城中鏡：陳新滋浸大私房菜款貴賓

喺九龍廣播道、原屬於浸會大學校長宿舍嘅「紹邦樓」，自變身為校方招待國際知名學者聚腳點同宴客廳後，校長陳新滋經常喺度款待大學捐款人等社會賢達。陳校長話以前多數叫到會，但食肆會收幾千元搬運費，仲貴過喺餐廳食，所以索性請名廚坐鎮，又開放畀各部門使用，結果經常爆滿！早前陳校長就喺紹邦樓宴請仁愛堂副主席羅台秦同老公戴澤良等人，事關佢哋捐款支持浸大基礎科學教學。當晚特首梁振英嘅太太梁唐青儀亦係座上客，羅台秦話因支持減少廚餘而同梁太熟稔，當晚特登邀請梁太去睇吓點樣喺浸大推動環保。眾人對紹邦樓嘅私房菜讚不絕口，笑言要捐多啲錢畀學校，咁就有得再食過喎！