城中鏡：楊諾思當大使 捐筆送暖
今日係國際女童日，國際培幼會（香港）為咗提供最基本嘅學習工具畀落後地區嘅女童，將於本月二十日至月底舉行「愛．女孩」「筆．生幸福」鉛筆捐贈活動，呼籲市民捐出鉛筆，以便喺聖誕節前轉贈畀內地同非洲加納嘅女孩，於佳節送上溫暖。尋日一眾「愛．女孩」大使包括英皇鐘錶珠寶主席Cindy楊諾思、前高官廖本懷太太毛妹同「蜘蛛女」Lisa鄭麗莎齊現身啟動禮，為落後地區嘅女童打氣。
鄭麗莎隨時準備做媽咪。
楊諾思擔任「愛．女孩」大使，呼籲向落後地區嘅女孩送暖。
國際培幼會（香港）行政總裁詹文利（左）同毛妹（右）齊為活動助陣。
Cindy話身為母親，好明白教育嘅重要性，所以好認同培幼會推動呢項活動。早前國際巨星畢彼特同女友安祖蓮娜祖莉訪港，兩人趁颱風襲港期間幫襯中環英皇珠寶，結果畢佬豪花二百萬元買了三隻名錶同一條鑽石頸鏈贈女友。Cindy話事前唔知佢哋會去幫襯，覺得好榮幸。佢覺得買珠寶通常係女士自己話事，但係畢佬全程傍住女友揀選，認真溫馨體貼。
蜘蛛女準備「造人」
「蜘蛛女」Lisa上月出嫁成為汪太，問佢感覺如何？佢笑笑口話：「好開心，好興奮！」仲話人生進入另一階段，會告別運動員生涯，專心做一個稱職太太。依家佢除咗轉型做教練之外，亦修讀緊戲劇教育碩士課程。咁幾時生BB？佢笑稱婚前做齊身體檢查，隨時準備造人喎！Lisa係連續六屆香港健體小姐冠軍，又喺長洲搶包山比賽封后，體能咁Fit，生多幾個都唔怕啦！
