SUN搞作：少膽虫手記：芙蓉芙蓉飯
少膽虫雖然明知難食，但係為表忠心，決定再戰壹全霉飯堂。諗住嗌個保保險險嘅芙蓉煎蛋飯返上office食、扮吓同員工同甘共苦咁啦，勢估唔到，飯堂貫徹壹全霉毫無底線嘅作風。如壹名奴工所言，「因為那片煎蛋，竟然鹹得離譜，吃不了幾口，我決定丟棄那片煎蛋」，但少膽虫當然不會「只吃豉油、白飯及尚有一點蛋香的油水」啦，於是少膽虫他他條條咁蹺起隻腳，喺櫃桶拎隻「庸記」燒鵝出嚟，一路食住一路歎……
「縮腳！」少膽虫嚇鬼親，口中左髀跌落地，又聽見有人喃喃自語：「你就有銀食燒鵝，堆填區爛全霉就唔找數！」原來係清潔阿姐「潔姨」係少膽虫枱前一邊拖地一邊鬧人。對於有人因勞資糾紛喺公司散播仇黎情緒，少膽虫大為緊張：「阿姐，幫幫忙，唔好再講喇。」阿姐一於少理，繼續鬧：「我有講錯咩？又想壟斷市場，又要爭錢唔還，咁無品都有？」阿姐大力一拖，將左髀掃咗去編輯肥豪度。
「你啱！你啱！」少膽虫幾乎要跪地哀求：「唔好再講台灣《爛果》喇，畀淫賤黎聽到又搵少膽虫出氣！」點知肥豪咬住隻髀行過嚟，用油淋淋嘅嘴哄埋少膽虫耳仔：「腦腫，阿潔姨啱啱由隔籬TBB過嚟呢邊做，唔係鬧我哋呀……」少膽虫恍然大悟：「哦，好彩?！咁佢即係『新援』潔姨囉？」肥豪賤賤格格咁回應：「唔通仲有邊個『潔姨』？」少膽虫與肥豪相視淫笑。
