政壇：搞搞政：馮煒光傳任IC 舊黨友圍住啄
舊年應徵副局長嘅南區區議員馮煒光，佢旗下公關公司喺剛過去嘅周日，負責藝發局藝術範疇代表提名推選活動，因選票印刷釘裝出錯鬧風波。殊不知事隔多日後傳出，佢獲垂青做月薪達十八萬元嘅新聞統籌專員（IC）職位，引來政圈好大回響，普遍反應係毀多於譽。特別係佢嘅白鴿黨前黨友，不留情面踩到佢一文不值，質疑政府係咪無人才到呢個地步，仲批死佢會成為特首嘅負累。
設計圖片
其中劉慧卿妙語連珠寸爆馮煒光非新聞界出身，憂慮佢未必勝任，佢處理藝發局選舉安排混亂已有辦睇。佢又批評政府依家好多時都「甩轆」，好似教育局局長吳克儉等人，直言如果馮煒光又搞到「一鑊泡」，咁就真係死得。
特首辦尋日拒絕證實馮煒光做IC嘅傳聞，相反馮煒光就親自披甲上陣，接受多間電視台訪問反擊各方質疑，綜合有以下兩個訊息，首先反駁公關出身唔適合擔任IC嘅說法，反稱會有增值效果，其次係IC必要時可以做發言人，好似白宮發言人咁，另外又可以選擇發放各項訊息嘅先後次序，事關呢啲全部都係公關工作。
當佢講得極之興奮之際即時「露底」，問及係咪接任IC時，佢講到明用三個字回應，點知脫口而出竟然係「不予置評」四個字，真係爆收場。
發展局副局有聲氣
另外，據聞發展局局長陳茂波亦有心儀副局長人選，有傳呢個人選有泛民背景。我哋曾先後向理大學者熊永達同電台前高層黃永查詢有冇人搵佢哋做副局長，前者話「從來無思考過呢個問題」，直言「搵到先講」，後者則連聲話「真係無」，又話自己冇去面試，收到消息就話你知喎！
