唔少立法會議員係南海人，例如Jeffrey林健鋒、李慧琼、葉劉淑儀，就連劉慧卿都係南海人之一。話說尋日卿姐經過立法會走廊見到同鄉Jeffrey，於是上前追數，話Jeffrey三年前應承過請佢食飯，但餐飯到依家仲未有得食喎！莫非Jeffrey想走數？

劉慧卿（左）向林健鋒（右）追番三年前一餐飯，但被寸冇回鄉證。

Jeffrey就話事發喺三年前，因為佢知道卿姐係同鄉，所以想帶佢返鄉下玩吓，順便一齊食飯，但點解呢件事不了了之呢？原因係卿姐冇回鄉證囉！所以就算Jeffrey幾咁想帶佢返南海，卿姐都返唔到。卿姐跟住打蛇隨棍上，話咁就要身兼全國政協委員嘅Jeffrey上京時，幫佢爭取攞番張回鄉證喇！

究竟南海有咩咁吸引，Jeffrey一定要喺南海先至請卿姐食飯呢？翻查網上資料，原來南海一直都係廣東嘅中心，依家嘅南海區，亦係廣東四小虎之一。據了解，由於南海密布河流，所以淡水資源好豐富，當然淡水河鮮無得頂啦，唔知啲「河蟹」吸唔吸引到卿姐呢？

第一手消息請下載on.cc東方互動iPhone/iPad/Android/Windows Phone Apps