政壇：議員復會未回魂
放完兩個幾月嘅悠長暑假之後，立法會前日復會，諗住班議員會醒一醒，點知發現有個別議員嘅放假Feel未散喎！立會內十八個事務委員會尋日亦舉行本年度首次會議，選委員會正、副主席、商討會期同議程。不過，有議員未開工就已經諗定放假，亦有議員開會時顧住傾偈，開會講咗啲乜都唔知，好似放完假未回魂咁。
設計圖片
大舊：返去瞓啦
發展事務委員會有成三十三名成員，若果會期要就晒每個人係冇可能嘅事，委員會原本打算最後一次會議定喺明年七月中旬，但議員「田二少」田北辰就話大會只係開到明年七月初，有乜理由大會開晒都仲要開委員會會議喎！
「大舊」陳偉業聽完後就立即扯火，話委員會會議一向都係開到七月底、八月初，大鬧話：「七月初放假？返去瞓啦！」
咁又係嘅，以往喺結束一個立法年度之後，就算大會開晒，好多事務委員會都繼續開會傾埋啲未完嘅議題，有時甚至要開緊急會議添！田二少咁問法，好難唔令人覺得佢掛住放暑假多啲喎！
面懵懵冇聲出
之不過，掛住放假都唔及開緊會發白日夢咁離譜。話說政制事務委員會會議討論議程時，劉慧卿已提出要討論本港履行聯合國《兒童權利公約》嘅情況，委員會主席「譚Sir」譚耀宗亦定咗十一月中開會。點不知隔咗冇耐，張超雄又舉手發言，話要定日期去討論卿姐之前所講嘅題目，搞到譚Sir忍唔住窒佢話︰「頭先你傾緊偈，我仲以為你可以一心二用添！」搞到張超雄面懵懵冇聲出。
