海難沉冤無真相 官官相護到何時

唔怪得海難家屬咁慶架。佢哋踢爆，自從海難獨立調查報告發表後，當局對慘劇嘅態度一百八十度轉變，唔止內部調查玩拖字訣，連交代調查進度亦不斷耍太極，一年幾以嚟，同官僚交涉所得嘅唔係真相同安慰，而係失望同疲憊。有家屬特別點名批評運房局局長張炳良，指佢對慘劇不聞不問，敷衍塞責；有家屬更加狠批港府隱瞞及拖延調查，一度當場痛哭落淚。

你話港產官僚係咪麻木不仁吖？拖延海難調查，等於令三十九名枉死市民沉冤莫白，等於向死難者家屬傷口撒鹽，港產官僚當無件事，何止係冇膊頭冇腰骨，簡直係冇良心冇靈魂吖。所以咯喎，海難家屬決定報警要求刑事調查海事處，揪出失職及違規官員，亦會向法庭申請進行死因研訊，期望搵出慘劇真相，討回公道。

嗱，港府呢啲咪自取其辱囉。沉船慘劇死傷枕藉，當局唔去秉持公義，全速調查，結果家陣隨時掉轉變成「被調查」、「被研訊」，簡直唔衰攞嚟衰。其實，警方都唔使點查啦，海事處失職係路人皆見嘅事實，呢，獨立調查報告早已踢爆，海事官僚做事馬虎，推搪塞責，由審批船隻圖則、監督建造，到檢驗程序，一條龍犯錯甩漏，因而埋下沉船禍根。太一叮好奇嘅係，警方會唔會查到有人貪污瀆職吖嗱，你知啦，上樑不正下樑歪，前特首曾蔭權爵士唔止「貪遍省港澳」，仲為乞見教宗而進行魔鬼交易，海事官僚因貪鑄成大錯，亦唔係冇可能囉。

咁講啦，海難真相仍待調查，但有人意圖官官相護，就唔使審都睇得出嘞。老實講，海事處疏忽職守，監管不力，間接害死三十九條人命，如果喺外國，早就有高官問責落台啦，點會好似港府咁，仲喺度慢慢調查慢慢跟進吖，點可能庸官我自為之吖。海難家屬打算報警調查，開庭研訊，太一叮樂見其成，起碼陽光之下，官官相護嘅作業黑箱有機會打破吖嘛。

係喎，海事處處長廖漢波等一眾高層據傳月內會執包袱退休，唔該警方要查就爽啲手嘞，失職官僚一個都唔可以畀佢哋走甩o架，叮！