城中鏡：梁耀進拓戰線賣拉麵
近年香港掀起一陣拉麵風，唔少日本拉麵過江龍襲港，見到個「孖屐」咁受落，做開中餐嘅稻香都唔輸蝕，同日本長崎拉麵店RingerHut合作，尋日就開咗首間分店，唔好以為「又係豬骨拉麵，有咩咁特別呀」，呢間就正正係sell健康，賣田園風味嘅蔬菜拉麵。
梁耀進首度進軍中式以外的餐飲業務，引進特色日本拉麵。（資料圖片）
稻香今次係首度進軍中式以外嘅餐飲業務，行政總裁梁耀進話要品牌多元化，今次仲係標誌着進軍日本菜市場的里程碑添。稻香、RingerHut將分別以百分之五十一及百分之四十九股權方式合作營運，之前聽聞今年會開兩間分店，第一間分店就選址九龍灣淘大商場，每間分店投資額約四百萬元。
RingerHut係日本麵界龍頭之一，拉麵以大量新鮮蔬菜、健康、營養為主打，同一般豬骨拉麵好唔同，湯底會較為清淡，一碗拉麵集合咗七種野菜，當然都有肉類和海鮮，拉麵價位較為大眾化，食慣「重口味」嘅香港人可以refresh一下啦！
