城中鏡：李蔚盈夜探製茶秘密
盛夏過後，就係採摘茉莉花茶嘅季節。福茗堂創辦人李少傑女兒Olivia李蔚盈上月親往中國茉莉花之鄉──福建嘅福鼎採茶。撞啱今年茉莉花豐收，漫山花海處處，濃郁花香撲鼻。Olivia即場學做茶花女，仲目睹整個製茶嘅過程。
置身喺茉莉花海，李蔚盈笑言滿身花香，變咗做香香公主。（受訪者提供）
咪睇Olivia弱質纖纖，佢接掌家族茶葉生意五年，多次深入內地茶園採摘鐵觀音同龍井茶，但講到採茉莉花，就係第一次。佢孭起背囊，戴上太陽帽，親嘗新鮮出爐茉莉花茶。茉莉花香最濃時，茶農把握黃金時間摘下花朵，製成頂級茉莉。採茶最佳時間係下午三、四點，但最好製茶時段，卻係入夜後。佢晚上十一點幾與同事摸黑到茶師嘅工場，見證製茉莉茶的過程。
炮製頂級茉莉茶葉，需要經過「七窨一提」，茶師將大白毫的幼嫩芽葉，配以茉莉鮮花，比例講究到極，需要經過七次反覆窨花、風乾，以增加花香濃度。Olivia用心記低每個製茶工序，眨眼睇到凌晨兩、三點。「通頂」製茶雖辛苦，但佢卻高呼大開眼界。
