巴黎係時尚之都，好多潮人周不時都會去走一轉，吸收下潮物嘅最新情報，咁啱時裝設計師Dorian何國鉦早前都去咗巴黎喎！不過，佢唔係去巴黎旅遊咁簡單，而係去展示佢旗下時裝品牌「Doll by Dorian Ho」嘅新系列。

陳君宜都有嚟睇Dorian嘅新作品。

何倍倩對Dorian新系列嘅母女晚裝裙最感興趣。

何國鉦特別租咗一個酒莊取景拍攝。

模特兒拍攝首飾系列期間，Dorian（中）全程（目及）到實，態度認真。

酒莊環境有如世外桃源。

由於法國正值時裝周，佢喺當地遇上唔少熱愛時裝嘅好友，包括恒生新抱何倍倩、名媛羅可旋同陳君宜，咁啱遇到，當然唔會錯過睇吓Dorian嘅新作品喇！其中何倍倩對Dorian新系列嘅母女晚裝裙最感興趣，六月誕下一對龍鳳胎嘅何倍倩，儘管龍鳳胎囡囡（細孖）尚未足四個月大，佢已急住為囡囡選購母女裝，齊齊扮靚靚。

另外，Dorian此行亦順道喺當地搵模特兒拍攝佢嘅全新首飾系列，為配合春夏主題，佢特別租咗一個有如世外桃源般嘅酒莊取景拍攝，佢仲好緊張，全程都𥄫到實。辛苦工作過後，佢即刻「萬歲」請工作人員大擦生蠔作慰勞，佢話：「其實我嚟巴黎之前食錯嘢搞到腸胃炎，啱啱先好番，嚟到巴黎又患上感冒。」咁仲食生蠔？佢話：「唔怕，呢度生蠔好乾淨。」

第一手消息請下載on.cc東方互動iPhone/iPad/Android/Windows Phone Apps