政壇：搞搞政：怪醫大條道理做懶蟲
立法會醫學界議員「怪醫」梁家騮喺呢屆立法會「榮升」新一任大懶蟲，喺立法會多個委員會嘅出席率都包尾，但原來佢喺新一個會期就連同佢專業有關嘅長期護理政策小組都退出埋，仲大條道理咁講︰「呢個唔係我直接範疇，我係做醫療，唔係做福利！」怪醫將自己所屬範疇愈畫愈細，索性當乜嘢都唔關自己事，翹埋雙手等出糧算啦!
設計圖片及對白
喺上一個會期，怪醫無論喺內會及財委會嘅出席率都差強人意，喺其中四個委員會更係包尾，即使係喺長期護理政策小組嘅出席率亦不足四成，點知佢最近仲去信畀小組委員會主席話要退出。怪醫就話，小組委員會開會時間「長期唔規則」，好難夾時間，而且佢係做醫療，唔係福利咁話。如果係咁，佢真係應該退出埋福利、經濟發展同人力等事務委員會喇。
除咗怪醫之外，超級議員李慧琼上周亦以有其他事務安排、未能兼顧為由，退出咗《二○一三證券及期貨（修訂）條例》委員會。
