政壇：莫乃光爭設科技局食詐胡
話說立法會資訊科技界議員莫乃光早前為爭取成立科技及通訊局，同特首辦互指不是產生「小風波」，有心人拆解話嚴格嚟講兩者都無錯，只係莫乃光反應太快，將尚喺低調沙盤推演中嘅情節提早曝光，搞到政府無彎轉要硬接佢呢招喎！
其實政府短期內都唔會再提架構重組方案，莫乃光突然出招爭取科技及通訊局，莫非佢「收到風」提早做嘢諗住「成功爭取」攞分？原來確係有有心人就增設資訊科技及廣播局去搵各方持份者「摸底」，發現如將建議提交立會，會得到足夠票數通過，最大隱憂反而係科技及通訊局局長人選問題，有心人認為只要搵到喺業界具江湖地位嘅人肯做局長，而呢個人又係身家清白，唔會畀人搵到黑材料，其他都唔係大問題。
不過講到尾，資訊科技及廣播局個蛋糕有排都未焗得熟，而「成功爭取」最緊要就係時機，身為議會初哥嘅莫乃光首次「食詐胡」尚屬人之常情，究竟呢個意外情節係催化此事定係幫倒忙，大家就要拭目以待喇！
