政壇：建制派飯局無「官」一身輕
每隔兩三個月，建制派嘅立法會議員就會搞飯局聚一聚，以往有官員出席，每次最少都有接近三十人到場。但喺立法會聽日「開學」前夕，尋晚嘅建制派飯局既無特首亦無官員，出席人數亦跌至二十個，而且一粒鐘唔夠就散席。時間雖短，但據聞佢哋都傾咗四大議題，證明無官員在場，建制派反而高效率咗好多。
二十名建制派議員出席尋晚嘅飯局，唔使一粒鐘就散席。
出席尋晚建制派飯局得二十人，但可能人少少反而暢所欲言，據聞佢哋傾過國泰豪華包機事件，多位議員都認為未來應該繼續照去呢啲款待團，只要做足申報就得，亦唔使為接受款待定出金額上限，否則議員好難同商界溝通。據悉會上有人話，如設上限只會益晒民主派，因為佢哋向來都接受小型款待喎。
班議員都有傾樓市「雙辣招」，但呢樣就無乜共識，各黨只係各抒己見，如工聯會講明支持政府，唔支持商界提出修訂，而民建聯就話想睇定啲，未決定投票立場。當然議員亦最後檢視各委員會嘅正副主席人選，最後決定得政制、司法、交通同保安同泛民對撼，議員喺其他委員會可以自由投票。
