政壇：李嘉誠基金會倡奏「愛心進行曲」
李嘉誠基金會喺二○一○年啟動嘅「香港仁愛香港」公益行動，繼順利完成咗三個回合嘅「Love Ideas,Love HK集思公益計劃」，再接再厲，第二期推出首項活動係與社工界別合奏「愛心進行曲」，由香港嘅社工隊伍引領愛心行動，呢個項目總額達三千萬元。
社工界出謀獻策助基層
基金會創辦人李嘉誠話，專業社工猶如社會嘅「愛心工程師」，走喺社會基層最前線，了解每個角落唔同嘅唏噓同需要，對如何緩解弱勢社群，改善社會民生有「特效作用」同貢獻。「愛心進行曲」將指揮棒交畀社工，相信社工會以專業角度及價值觀，為建設關懷社會出謀獻策，提交「愛心行善」建議書，最終由業界合資格社工投票選出具意義嘅項目，得票最高嘅百分之廿五申請，可獲基金會資助港幣十萬元，與合資格嘅公益團體協作，實踐其愛心計劃。
每位社工申請項目數量不限，若多過一個申請獲選，獲最高票數嘅項目將得到資助。「愛心進行曲」網站www.lovehkyourway.org，將於十月十九日起接受社工登記參與，十一月一日至三十日，可以提交項目建議書。
