唔經唔覺，DR醫學美容毒針奪命事故已經過咗一年，對女死者家屬嚟講，呢一年特別漫長，特別難過。尤其係當局調查慢過龜爬，至今真相未明，責任未釐清，家屬唔悲憤至奇。

人嘅忍耐係有限嘅，毒血針死者丈夫尋日到政府總部請願，質問當局：「究竟整件事嘅真相係點？係邊個令我哋失去至親？呢啲疑問到依家都未有答案，太太死得不明不白。一日沉冤未雪，我哋一家嘅傷痛依然揮之不去。」一字一淚，令聞者心酸。

其實，當局究竟調查成點，何只死者家屬滿腔疑問，好多人都好想質問港產官僚。喂，一年咯喎，有乜嘢結論呢？點樣加強監管呢？講句唔好聽，當局麻木不仁，調查冇下文，責任未釐清，漏洞未填補，受害人真係死不瞑目吖！

話時話，港產官僚辦事拖拉，點止對唔住死者，更加對唔住市民。大家應該記得，毒血針搞出人命之後，當局誓神劈願規管醫學美容，又話規定註冊醫生負責，又話指定場所進行，講到天花龍鳳，係威係勢，點知風頭火勢一過啫，即刻當乜事都冇發生過。一年嘞，醫學美容依舊無王管，日日打正招牌做生意，針照打，血照抽，手術照做，諗起都得人驚喇。港產官僚見到棺材都唔流眼淚，唔通真係要再搞出人命先至知驚？

最好笑嘅係，港府得過且過，從來都係有姿勢，冇實際。莫講立法規管醫學美容十畫冇一撇吖，連醫學美容究竟應該歸入醫療定美容嘅最基本問題都未釐清，等當局研究得嚟，唔知又有幾多市民受害咯。

所以話啫，太一叮有時真係懷疑，港產官僚係咪都畀人注射咗「冷血針」，如果唔係，點會咁麻木不仁o架？係人都知，醫學美容良莠不齊，亂象叢生，你哋唔嗲唔吊，慢條斯理，講得好聽就係疏懶失職，講得唔好聽就係草菅人命吖！

總而言之，醫學美容害人枉死，無規無管太無天理。港產官僚唔好再拖喇，快快查明事故真相，揪出幕後黑手，掃除行業亂象，以免再有人受害吖，叮！

第一手消息請下載on.cc東方互動iPhone/iPad/Android/Windows Phone Apps