TVB電視劇長期獨霸香港市場，由於同時段沒有對手，所以，養出一班不思進取的製作團隊，劇情犯駁已不再是問題，內容缺乏基本常識而出醜的，更無人追究，遂導致業內人心散渙，得過且過，蕭規曹循。最近，網上有好事之徒，將TVB近年的劇集常見的對白抽出調侃，名為「TVB體」，諷刺他們的編劇沒創作力，用嚟用去都係嗰幾句，例如，凡出事後，總有人說：「你知唔知你咁做，係好危險o架？」當對方默言不語時，又奇奇怪怪的說：「你餓唔餓呀？我去煮碗麵畀你食！」

每次戀情有變，最佳的對白係：「感情嘅嘢，係唔可以強求嘅！」低頭嘆息：「我想一個人靜吓！」以至影響埋大陸高官，那經典中經典的台詞：「你有冇諗過我感受？」

當香港電視文化影響內地時，大陸的劣質官場廢話，也深深插入香港廢柴政府的高層心坎裏，於是，我們亦有了「香港庸官體」，例如：凡出事後總有廢柴說：「我哋會虛心聆聽市民意見，並成立跨部門小組跟進。」當大家慶到講不出聲時，庸才又奇奇怪怪的說：「我感受到你哋嘅感受嘅！依家重中之重嘅跟進工作，係會尊重同平衡各方持份者嘅利益，喺適當時候開展諮詢程序。政府相信，係仲有優化空間嘅！而且，將會成熟一項推一項，穩中求變，迎難而上，適度有為，持之以恒，開誠布公，無縫交接……」

一句到底，係「No comment」。

當一家電視台獨霸市場，觀眾冇得揀時，咪焗聽TVB體」囉！同樣，香港再無普選，那「HK SARS體」便無休止的爆發下去！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps