SUN搞作：少膽虫手記：無柿
今日出中環搵律師時問聲淫賤黎有無醫腦嘅針藥要買，淫賤黎敷衍話：「見壹全霉無咩就買咩啦！」少膽虫見秋意漸濃，就買咗幾個生果返來。
「腦細，我見壹全霉霸住個堆填區咁大、報紙燒量咁高，債務又咁多，實在無咩需要喇……」淫賤黎唔耐煩，打斷少膽虫：「你唔係學古人馮諼同我買『義』番嚟呀？我唔要！我不義，我係壹！而你係零！」
「唔係呀，我買嘅係生果。」少膽虫細聲道。淫賤黎破口大罵：「爛果我哋大把啦！你仲買番嚟，家陣壹全霉好多錢呀？」少膽虫企埋牆角，篤住手指話：「唔係呀，呢樣嘢腦細你真係無……」淫賤黎冷笑：「講嚟聽吓！」
「柿。真係睇勻壹全霉都無呢樣嘢呀。」少膽虫從身後取出一塊已經變扁嘅柿餅，遞畀淫賤黎：「食柿啦你！我見啱啱當造，畀晒啲柿你食！」
未曾有柿，淫賤黎拎上手如獲至寶：「我要all（註：全部）柿！好彩你講得幾有道理，唔係實打到你變柿餅！」淫賤黎索一索，好似TBB飲食節目主持「咪姐」咁，未咬落去就大笑：「哈哈哈哈！真係好juicy！好有柿味，一啲蕉味都無！哈哈哈哈！」
少膽虫堆出一臉奉承的笑容，心想：「有得食好食喇你，呢排又有咁多誹謗官司打，我驚第時柿都無得你食呀！」
