SUN搞作：網絡小說：禮義廉
「姑娘，我想睇牙醫。」櫃台護士一聽，即覺此人聲線猥褻，抬頭一看，原來是貪曾。「姑娘，我真係好痛，不如我畀啲着數你，你畀我睇先！」貪曾乞求道。「後門喺右手邊。」貪曾狐疑地問︰「我係想睇醫生，做咩叫我走？」只見護士一臉不屑︰「乞見教宗你使橫手，連睇醫生都要咁做，你咁鍾意走後門，咪話你知囉！」
遽然間，貪曾身後竄出一人，卑躬屈膝，手掩腫脹臉頰說︰「你咪亂講，呢啲不過係傳聞！」禮義廉黨的葉落欠也來求醫。「傳聞？倒不如話你個黨嗰啲『成功爭取』先係傳聞！」葉落欠被激得面紅耳熱︰「你……」
「咩事咁嘈，騷擾我睇症？」醫生從房內步出。「呢兩條友嚟睇症喎！」護士向醫生道。醫生看看二人，便說︰「大門喺嗰邊，走喇！」貪曾與葉落欠一臉不解︰「點解叫我哋走？」醫生輕蔑道︰「『無齒』之徒，仲使鬼睇咩！」
