城中鏡：陳永棋意國充電遇雷劈
香港中華出入口商會尋日舉行酒會，好耐唔見嘅全國政協常委陳永棋都有現身。呢個暑假同五位家人去咗意大利西西里島充電嘅棋哥，仲大講驚險奇遇，話呢一程佢遇到雷劈。
陳永棋
意大利西西里島火山吸引唔少遊客。（資料圖片）
佢話嗰日本來風和日麗，但一登火山，萬里晴空亦開始變成雷雨交加，佢想走避時，一道猛雷已從天而降，直劈落佢左邊天靈蓋。佢話當時感受到一股電力從頭頂一直貫穿至左腳腳趾尾，當時以為實死無生，點知最後左邊身麻痹三個鐘就無事，連醫生都唔使睇。嘩，唔通雷神託世？棋哥話，可能係五位家人同時被劈，一齊分擔咗電力，如果唔係一早死咗喎。大難不死嘅佢尋日同立法會主席曾鈺成密斟幾分鐘，期間大讚曾鈺成近日發表嘅政改言論係「君子有承擔，睇嘢夠長遠，唔怕畀人鬧」！
另外，該商會最近豪花二百四十萬元大裝修會所，換晒防滑地磚，連廚房都換晒新廚具，兼夾總廚都換埋，成個場煥然一新。
