城中鏡：九巴兩小公主 家中練行騷
兒童時裝漸受時裝界重視，日前一眾名人帶埋子女出席時裝騷，包括「九巴新抱」雷林靜怡（Jane）、周國豐與太太黃泳霖（Jenny）等，講起小朋友練習行騷，做父母嘅都好興奮，投入程度仲緊張過自己親身上陣。
「九巴新抱」雷林靜怡（中）帶同九歲大女Jacqueline（右）及六歲細女Jamie（左）出席時裝騷。
周國豐一家三口撐時裝騷，穿住小西裝、戴太陽眼鏡的兒子仲係跆拳道小子。
周禮淳（右）和小拍檔行騷，有型有款。
Jane帶同九歲大女Jacqueline及六歲細女Jamie行騷，Jane透露，兩個女經常喺屋企練習行騷，更鍾意着佢嘅鞋，唔通佢哋人細細都敢嘗試高踭鞋？暑假啱啱過，Jane透露佢哋早前去咗美國嘅主題公園玩，咁佢會唔會畀女兒到美國讀書？Jane表示：「都要睇睇，我鍾意囡囡喺身邊，自己handle唔到先送佢哋去第二度，因為會唔捨得。」
周國豐呷囝囝醋
另一對緊張父母係周國豐與太太Jenny，Jenny透露大兒子周禮淳（Winston）有學跆拳道，老公想Winston做武林高手，講到母子感情，佢大爆Winston話全世界最鍾意係媽咪，搞到Daddy呷醋、唔開心，不過，Winston都事後補鑊，話一樣鍾意Daddy，咁細個就識玩平衡，唔怪得Jenny希望追多個女喇。
