政壇：搞搞政：張宇人減辣修訂 泛民願「落疊」
立法會審議「買家印花稅（BSD）」嘅法案委員會開始逐條審議，依家最少有兩個議員會提減辣修訂，地產及建造界石禮謙（大舊石）嘅兩項「減辣」修訂，暫時只獲商界支持，泛民兩黨至今未決定，據聞兩黨寧願支持飲食界張宇人提出嘅近似修訂，都唔肯同地產商扯上關係，擔心與民為敵。
設計圖片及對白
身在海外嘅大舊石越洋發聲，話雖然中文大學有調查顯示六成市民撐維持辣招，但唔代表政府要跟民調做人，否則以後普選、高官去留都跟民調做事，真係唔知邊個大鑊啲喎。佢雖然赤膊上陣，但議會內政黨就未必願「落疊」，據聞泛民兩黨認為佢同地產商關係太密切，唔多想支持佢，避免背後中箭。富貴黨嘅張宇人就另提修訂，雖然兩人內容相近，但因張宇人「地產味」少啲，有機會成為泛民支持修訂嘅最佳落台階。
資訊科技界莫乃光同會計界梁繼昌已講明，唔會支持豁免港人公司嘅修訂，否則成條BSD猶如被廢武功喎。白鴿黨主席劉慧卿尋日就話，有唔少商界人士向佢反映，憂慮政府政策朝令夕改，會搞到啲投資者卻步喎，似乎係為佢哋支持「減辣」放風喎。
