政壇：每周之星：至叻星：考評局派花紅 吳得掂A字膊

香港考試及評核局被揭向員工大發七百萬元花紅作獎勵後，受大加考試費影響嘅考生及家長好不滿，公眾亦對向政府申請撥款補助嘅部門破天荒派錢嘅做法感詫異，考評局一眾高層都被詬病，教育局局長、前考評局主席吳克儉（吳得掂）嘅角色更被立法會議員再三質疑。吳得掂龜縮兩日後，尋日首次開腔，佢話在任考評局時有聽過委員會嘅建議，但喺局方拍板之前佢已經離開咗考評局，暗示個決定同佢無關，而係獨立嘅委員會決定。佢卸晒責畀獨立嘅委員會，真係盡展A字膊絕技。