政壇：東亞職員輕生大樓 貪曾當年兩度租用
由李國寶任主席嘅東亞銀行，旗下位於灣仔東亞銀行港灣中心分行，前日發生女職員疑因壓力大而跳樓嘅自殺案，該名女文員穿紅色銀行制服由中心二十一樓女廁一躍而下，飛墮四樓平台身亡。事發後，有心水清嘅人醒起「貪曾」前特首曾蔭權爵士當年兩度競選特首時，就正好租用港灣中心一個全層寫字樓作為競選總部，心諗唔知貪曾當年兩次租用嘅樓層，係咪正正係發生自殺案嗰層樓呢？
貪曾○五及○七年兩次租用東亞銀行港灣中心寫字樓做選舉辦公室，每次出入都搞到好混亂。（資料圖片）
貪曾○五年準備參加特首補選、但仲未辭去署理特首職務時，已經火速租用東亞銀行港灣中心二十二樓全層做競選總部，比前日自殺案事發地點只係高一層。為咗扮神秘，起初連地下水牌都唔掛，大批傳媒收到風到場採訪時，大樓保安即奉「東亞老細」之令擋駕記者拍攝，一度出動雨傘陣阻擋記者視線，真係奇招盡出。
到○七年貪曾準備競選連任特首時又租用二十八樓全層，冇租番之前用開嘅二十二樓，樓層雖然係靚冧巴，但貪曾已被揭毫不避嫌乘坐特首座駕前往競選辦，途中仲要勞煩警車開路護駕，引來「公器私用」、公然利用政府資源為個人選舉造勢等炮轟，原來嗰陣貪曾嘅貪婪、亂花公帑嘅劣行已經表露無遺。
