政壇：葉建源申報寧濫勿漏
公職人員一舉一動都要好小心，早前行政會議成員同立法會議員被踢爆接受款待豪遊法國，呢場風波再次掀起政圈風暴，焦點就係應邀出訪嘅界線喺邊度，議員會唔會因而墮入軟性游說甚至影響投票嘅漩渦中。事件之後，公職人員更加小心翼翼，甚至可以用踴躍向秘書處申報嚟形容，表現得如驚弓之鳥嘅有教育界嘅葉建源，佢上月赴台灣參加教育界研討會，事後留在當地玩多兩日，佢一一申報，絕無遺漏，真係見過鬼怕黑噃。
設計圖片及對白
從近期向秘書處申報嘅資料嚟睇，啲議員大都採取「寧濫勿漏」嘅態度，譬如出訪去過邊度、收過咩禮都一一列出來，葉建源上月初以教協身份，飛赴台灣出席教育界研討會，此行獲得當地教師工會贊助食宿，加埋唔使九千元。
不過，葉建源喺利益申報表上都額外註明：「由於本人是教協會推薦出選立法會教育界議席的代表，為求讓公眾清楚有關贊助，特此登記。」佢嘅申報仲連會後留多兩日都交代埋，避免被人抽秤。
陳健波中秋收禮物籃
有理冇理向秘書處報備嘅，仲有上次喺豪遊團中要捐錢平息質疑嘅保險界陳健波，上月中秋節，佢連保險公司送嘅中秋節禮物籃都照報無誤。議員陳家洛亦不遑多讓，佢獲台灣書商一口氣送咗五十本書，當中四十七本書係研究東歐文化嘅周刊，埋單都成一千七百元，佢亦向秘書處申報。
陳家洛解釋，早前出席東歐文化講座認識呢位周刊總編，交換咗卡片後就收到呢箱書，強調唔係佢要求人哋送，但人哋一番好意佢就照單全收，因此即時申報免麻煩。豪遊風波搞到議會變驚弓之鳥，從公共知情權嚟講，未嘗唔係好事。
