海難周年冤未消 瀆職官僚哪裏逃
聽日係「十一」，對市民嚟講，既係偷得浮生半日閒嘅歡樂假期，亦係南丫島海難一周年嘅沉痛日子。一年前，三十九條人命枉死大海，一年後嘅今日，遇難者沉冤未雪，不少家屬未走出悲痛，涉事官員未受到應有嘅處罰，令呢個本來應該輕鬆度假嘅日子，蒙上咗憂傷。
其實，唔止遇難者死不瞑目，家屬悲憤難平，好多市民一樣義憤填膺o架。喂，撞船慘劇發生咗足足一年，當局查出元兇未呀？懲處涉案官僚未呀？港府調查報告都講啦，海事處疏忽職守，糜爛不堪，居然一直冇人被追究、被問罪，當局咁嘅表現，等於公布有命案發生，但係翹埋雙手唔去緝兇，荒唔荒謬啲呀？
嗱，喺呢個時候，居然傳出一個相當令人震驚嘅消息，就係海事處由下個月起進入退休大潮，包括處長廖漢波在內嘅多名高層年底前紛紛夠鐘咬長糧，咁搞法，咪走得快，好世界？你知啦，運房局對海事處嘅內部調查進度慢過龜爬，如果調查未完成，涉案官僚已經捧住豐厚退休金離職，瀆職者唔使受罰，反而有獎，咁仲有天理嘅？
咪話太一叮以君子之心度小人之腹，海事官僚監管船隻安全甩甩漏漏，渾渾噩噩，不過講到縮骨卸膊逃避問責，佢哋認咗第二，冇人敢認第一。大家應該記得，海難爆發之後，身為海事處掌舵人嘅廖漢波淪為全城箭靶，但佢死雞撐飯蓋，企硬不認錯不道歉不問責，就算畀死難者家屬轟為「泯滅良知」，依然好官我自為之，面皮三尺厚，導彈都打唔穿，如果唔係社會民情愈來愈洶湧，港府面對嘅政治壓力愈來愈大，佢都唔肯公開道歉呀。大家話嘞，一班咁無恥嘅官僚，加上一個咁無效率嘅調查，有人乘機急流「怯」退，金蟬脫殼，逃避究責，係咪一啲都唔出奇吖。
咁講啦，如果撞船慘劇係一面鏡子，照出海事處疏忽職守糜爛不堪，咁慘劇後向瀆職官員究責就係一個試金石，測試到港府有冇撥亂反正嘅決心。港府咪想建立管治威信，提振低迷民望嘅？仲唔盡快依法處置違規官員，一個都唔好畀佢走甩，否則惹來官官相衞嫌疑，盞威望跌多幾錢重嘅咋。
一句講晒，海難周年冤未消，瀆職官僚哪裏逃。所謂小心駛得萬年船，大家聽日如果外出玩樂，小心為上，防止樂極生悲，叮！
