SUN搞作：打橫嚟講：垃圾徵費廢柴方案
日日望住香港特區呢班垃圾官員、廢柴庸才的低B行徑，真係人都癲。
面對每日一萬三千幾公噸廢物運去堆填區，這裏的庸官商議垃圾徵費方案，足足超過十年後，今日竟毫無責任和誠意，拋出三個「垃圾到無倫」的假諮詢。
話佢哋做諮詢，係因為點快點搞，都無法喺今屆政府嘅「立法年度」提交條例草案，若二○一六年立唔到法，咪又要到下屆「從頭嚟過」囉！
炳佢廢柴政府無責任和誠意，不單只hea住造假、氹吓人咁不負責任和沒誠意去「完成徵費」任務外，呢單嘢嘅「真正負責人」應該係環境局嘅黃錦星呀！但佢又龜縮唔見咗人，只搵件不吃人間煙火嘅少爺仔出嚟獻世。
有關垃圾徵費的政策嚴肅討論，我留番畀啲二流評論員去分析，我只用實質民情去睇呢件事。
講起嗰件香港嶺南大學校長鄭國漢嘅老細的少爺仔，佢真不知人間世道！
佢話為咗要迫令全港百姓「唔方便」使用街邊的垃圾桶，佢主張「收起」同「減少」垃圾桶數量，二係將垃圾桶桶口全部改細佢，等啲人掉唔到垃圾及大件啲垃圾咁話喎！白癡仔！啲人咪放喺垃圾桶旁囉！收起晒啲垃圾桶？掉晒佢呀？咪又自製垃圾？改細啲垃圾桶桶口？要用幾錢呢？損人不利己！
最好笑的係，三個方案中，有「計重量」收費一項，吓？賣紙皮咩？我想像唔到，成棚人抬住垃圾袋排隊輪流去磅重科水囉！都幾好睇，肯定成為世界新聞。
嗱！唔好畀我批死，呢單嘢最終一係無聲無息謝咗算數；一係經過「社會討論」後，被插到阿媽唔認得，衰收尾一鑊泡，急急收皮，當無發生過！又留畀下手再玩！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
