SUN搞作：少膽虫手記：好色世界
淫賤黎今日一反常態，對住本紅簿仔不斷傻笑之餘，仲對少膽虫nice咗好多。「辛苦你喇，少膽虫……」淫賤黎開完會，竟然咬住拇指咁同少膽虫講：「你等陣得唔得閒呀，我哋去街shopping囉！」
少膽虫喺壹全霉嘅正業就係不務正業，因此完全無理由拒絕腦細要求。少膽虫戰戰兢兢咁上咗淫賤黎架車後座，正想扣安全帶之際，佢一手拍落少膽虫大髀：「唔使咁安全喎，我哋咁熟，不設防都得啦！」少膽虫嚇到鬆開條帶，係咁點頭「係！係！係！」但心入面暗叫弊傢伙。
淫賤黎成程車磨拳擦掌，有時兜番住嘴角口水。車啱啱停喺麗晶大賓館招牌下面，淫賤黎就急不及待落車衝入門口，拎出一大疊美金，撐喺櫃台上。「快啲！我要好色，我有好多錢！我要好色！」淫賤黎搥胸高呼。
「腦細，你又嚟買顏色筆呀？」店員氣定神閒拎出一盒顏色筆：「成間文具舖嘅筆都畀你買晒喇，呢盒最後喇。」淫賤黎如獲至寶：「好嘢！咁多顏色，可以髹晒全世界都得啦！啲動身淫、動爛畫呀，有排我畫喇！」
少膽虫好生奇怪，便問：「腦細，你邊樹有咁多錢將個世界髹晒顏色呀？」淫賤黎親吻顏色筆，喜道：「祖家出咗零用畀我，想燒幾多錢都得啦！」
