城中鏡：蘇菲來港 名人爭合照
意大利女星蘇菲亞羅蘭上周四遠道來港，前晚專程到澳門為珠寶店開幕擔任剪綵嘉賓，原來佢去澳門之前，周五晚喺香港參加咗一個品牌嘅晚宴，出席晚宴嘅嘉賓包括富商趙世曾同女伴、榮文蔚同爸爸榮智鑫，仲有「澳門大亨」洪永時同太太Deborah等等，名人喺晚宴中爭相同蘇菲合照，蘇菲亞羅蘭亦樂在其中，來者不拒。
蘇菲亞羅蘭（中）同澳門大亨」洪永時（右）及太太Deborah（左）喺晚宴上合照。
在香港晚宴上，榮文蔚盛妝赴會見偶像。
蘇菲前日馬不停蹄到澳門，戴上超過五百萬元頸鏈，穿上黑色低胸晚裝裙嘅佢，原本獲大會安排坐直升機前往，不過，蘇菲就拒絕咗改為乘船。當佢坐上高爾夫球車到場，抵達後馬上入店內跟品牌高層寒暄，然後到門外剪綵，唔知係咪因為舟車勞頓嘅關係，佢冇接受訪問就隨即離去。全程匆匆逗留十分鐘就閃人，期間更一度黑面，至臨行前聽到有人稱讚佢高貴漂亮，先展露笑容，仲送上飛吻添！
