名流趙世光嘅孻仔趙式慶同博愛醫院前總理Albert王嘉恩都係武術發燒友,佢哋為咗弘揚國粹,四年前成立中華國術總會,旨在保存同延續中華武藝。但係經歷數個寒暑,論成績仲係差強人意,於是佢哋決定改革呢個組織,除招攬才俊加盟外,近來仲連環出招,早前舉辦武術推介會,現場座無虛席,趙式慶仲即場耍幾招洪拳招式,其硬橋硬馬、虎虎生風嘅架勢博得滿場掌聲。

趙式慶示範洪拳招式,現場座無虛席。

王嘉恩(左)同周國豐分別擔任中華國術總會嘅會長同副會長。

弘揚國粹 構建體系

會長王嘉恩話中華武藝必須流傳於普羅大眾,中華國術總會於是決定改革,要將中華武藝普及化。而主席趙式慶就話武藝並非拳腳功夫咁簡單,當中涉及中國人嘅養生之道、哲學思想等精神價值,內容豐厚,絕對係中國文化遺產之一。趙式慶又慨嘆,百多年前日本就明白武藝嘅文化意涵,繼而將佢哋嘅國粹競技化、制度化同專業化,從而推廣海外發揚光大,呢啲都係中華武藝歷來所缺。故此要弘揚國粹,就有必要構建國術體系。

同為「武癡」嘅社交界名人Brandon周國豐亦有嚟撐場,佢話本地習武之風淡薄,唔及外國人咁熱衷,佢擔心長此下去,將來中國人習武可能要向洋人拜師學藝,所以當王嘉恩向佢招手,就義不容辭咁出掌副會長,期望可為中華武藝嘅保育工作出一分力。而廖創興家族後人廖偉芬就話小學時代曾練柔道,仲獲得「綠帶」資格,而佢練武係拜武打電影所賜。有份出席武術推介會嘅家品店創辦人楊志超都對中國武藝有興趣,仲話有意將中國功夫傳統嘅剪裁注入現代元素咁話。

第一手消息請下載on.cc東方互動iPhone/iPad/Android/Windows Phone Apps