政壇：搞搞政：幫星星開路陳智思變奶爸
為咗推銷垃圾徵費，可持續發展委員會主席陳智思呢排密密出席公開場合，尋日仲獻出生平第一次，亮相《城市論壇》，但因太瞓身落力，仲畀主持笑佢太長氣！其實，大家有冇諗過，要落實垃圾徵費咁大件事，唔係由環境局局長黃錦星做，而係由陳智思擔大旗呢？有人就話，因為陳智思民望高，一於由佢嚟做黃錦星嘅「奶爸」，同「奶媽」政務司司長林鄭月娥齊齊幫「裙腳星」擋箭護航。
設計圖片及對白
身兼行政會議成員嘅陳智思喺論壇上幫政府力銷垃圾徵費，仲落力到將三個收費方案、徵費水平、廚餘回收點做，甚至大型傢俬唔收錢等細節，滔滔不絕講出嚟，好似成份諮詢文件背出嚟咁，連平時多嘢講嘅西貢區議員「哪吒」方國珊都要讓路，卒之要主持插嘴，先順利去到廣告。之後主持笑指陳智思要學下兩分鐘內將要講嘅嘢講晒，仲邀請佢遲啲多啲去論壇、熟習下時間控制添！
陳智思解釋，論壇其實請過佢幾次，例如講扶貧，但扶貧政策好多人熟過佢，而星期日係佢嘅「family day」（家庭日），好多時都推晒工作陪屋企人，今次絕對係破例，為咗推銷垃圾徵費，乜嘢大大小小場合都出席，希望爭取到市民嘅支持。
哪吒就好奇咁話，垃圾徵費諮詢咁重要嘅環保政策，仲要協調多個部門，竟然環境局完全失晒蹤，反而推畀陳智思嚟做，係咪因為佢民望夠高？
